السلام عليكم
أنا أردت ان أحكيلكم عن قصة جميلة سمعتها واستفدت منها
وأتمنى انها تعجبكم وتستفيدوا منها

كان فى طالب فى احدى الجامعات كان عليهم محاضرة فى الرياضيات
والدكتور قاعد بيشرح والطالب صاحبنا دة نام وبعد شوية صحى فلقى المحاضرة خلصت ومفيش أى حد موجود غيره

لقى على السبورة تلات مسائل كتبهم وقال أكيد هما واجب ولازم أحلهم
راح المكتبة وكان شغله الشاغل انه يحل الواجب أصله كان نايم ومالوش عذر
بعد أيام من البحث والتفكير قدر صاحبنا انه يحل مسألتين لكنه كان مضايق لانه ماحلش التالتة

راح للدكتور وقاله انا آسف لأنى حليت مسألتين بس لكنى عملت كل اللى اقدر عليه
قاله الدكتور انت بتتكلم عن ايه؟
قاله الطالب عن الواجب
بصله الكتور وقاله أى واجب أنا ماديتكوش واجب
مدله الطالب الورقة وقاله المسائل دى يادكتور

خدها الدكتور ويبص فيها وهوة مستغرب وقاله دى التلات مسائل اللى كتبتهم وقولتلكم بلاش تشغلوا نفسكم بحلهم
لان مستحيل تلاقولهم حل ازاى حليتهم

رد الطالب ببساطة وقاله لأنى كنت نايم ومسمعتش كلمة مستحيل
ولحد دلوقتى موجودة المسائل دى فى الجامعة باسم الطالب دة


شوفتو بقى لو كان الطالب ده سمع كلمه مستحيل
مكنش حتى هيفكر انه يحاول يحل
ومكنش هيوصل لحاجه

لكن احنا اللى بنحط فى حياتنا المستحيل
ولو فكرنا نوصل ل اى حاجه احنا عايزنها
هنوصل ان شاء الله
بتوفيق ربنا



ملطوش طبعا
بس مع بعض التعديل