كنا هنا.....لسه هنا
وحلفنا حنعيش عمرنا
مهما الخريف فكر يبيع
و يدارى أحلام الربيع
والشمس تبعد عننا
كان اتولد جوانا شئ
مش محتاجين
اللى بيحتاجه البشر
يجى الخريف يرسم شجر
لو جالنا ليل يرسم قمر
ولما نشتاق للنهار
نقدر نلاقى شمسنا
كنا هنا
..................
فازاى يقولوا
اللى يقولوه
على خط اسود
ع الشمال
فى ركن صورتك
واترسم
قالوا عليه
خط الألم
معناه رحل؟
دا الجهل ياما كتير قتل
وبيقولولى
أكيد نسيت
بعد الرحيل
وحنسى ايه؟
دا الحب
ف بلادنا قليل
وبدونه ايه
راح اكون أنا؟
كنا هنا
....................
برحيل جسد
مش يعنى
ننزل بالستار
ينهى الروايه
والحوار
والمعجبين
حيصقفوا
واللجنه
هتقول القرار
شوفتوش مرار
أكتر من اللى
بيقولوه
ودا اسمه
سنه للحياه؟
وللا نقول
ان اسمه عار؟
من امتى
فى الحب اختصار؟
ويقولوا
انسى كاننا
ولا كنا يوم
واقفيين هنا
بس الحقيقه اننا
كنا هنا
...................
من امتى
بنسمى الهوى
فى سنين
حياتنا مرحله؟
من امتى صنفناه
فى كيميا
وللا فيزيا
وللا فى الجبر
حسابات
أو مسأله؟
من امتى
كان فى الهندسه؟
من امتى
سموه هلوسه؟
ياناس
دى حتى المريله
وكل لبس المدرسه
واحنا صغار
بنشيله ذكرى
و نحضنه
لحظة حنين
و احنا كبار
ونحن
لسنين الخضار
لهوى
نضيف نتنفسه
لما بتخنق
قلبنا
لحظة مرار
ولا قولنا
يوم
تقف الحياه
والرب
حامدينه
ف علاه
لكن
ومن امتى القدر
كان بس يوم
محض اختيار؟
فازاى فى يوم انسى أنا
وكاننا
ولا كنا واقفيين يوم هنا
بس الحقيقه اننا
كنا هنا
....................
وهننسى ليه
أجمل
ما ف قلوب البشر؟
وارجع اكون
حتة حجر
يفضل مكان
ما حيترمى
الحب
و الخير
والهوى
من امتى
كان فيها الخطر؟
مش طبعنا
ننسى
فى يوم وكاننا
ولا كنا
يوم واقفيين هنا
بس الحقيقه اننا
(لسه هنا)
الموضوع الأصلي :
كنا هنا .. لسه هنا الكاتب :
matrix المصدر :
منتدى شباب كول
الرئيسية
الدولة
