بنت ام بتعة مش عاجبة حد فى ماشيها
اكمنها مشيت طريقها لوحدها والاسرة غابت عنها
مشغولة عنها بعبئها .. سايبنها هية وشانها ..ولانها مستهدفة
الاجنبى ومعاه غبى فكرلها ..

قال اولا / ترفض معيشة اهلها .. ترفض اوامر ربها
ترمى الحياء والانتماء ورا ضهرها
تقطع جذورها بنفسها

وسوس لها
ازاى حتعرض نفسها وتبان مفاتن جسمها
من ضفرها لاعلى شعرة فى شعرها

تعمل موضات والاعلانات.. مالية الشاشات
بالشامبوهات والتسريحات وحاجات كتير فرحت بها
تاهت ونسيت نفسها

وتكلمك ربع الكلام بالاجنبى وتقول هالو
بنت ام بتعة تقول هالو ..!!
ميرسى يا سوسو وثانك يو
و come يا توتو ويلا go
وبكرة بينا رانديفو

وكبار شيوخ المسلمين معرفش ليه متلجمين ؟؟
والمسئولين فتحو البــيبان على وسعها

قام قال سلامة المها .. يمكن تغير فكرها
وتعيش حياتها بحلوها وبمرها

راح لامها يخطبها منها وقالها
بصراحة بنتك عاوزة حد يلمها وانا قدها


قالت ومالو.. البنت يلزمها الجواز
شخشخ جيوبك واشترى يلا الجهاز


قال اطلبى

قالت تجهز شقة قد اربع اوض
احسن موبليا فى البلد وتجيبها من دمياط
وتجيب نجف من غير عدد والمكنسة بشفاط ..!!
والدِش قبل الدوش
والفيديو والبوتاجاز
وتجبلها تلاجة ستاشر قدم
وتجبلها قبل الجواز
الشنطة والمحمول
وتجبلها غسالة فول
انا قصدى فول توماتيك
شقتها كاملة زى اى بوتيك

وتجبلها قبل الجهاز الشبكة طقم من الدهب انا مش حقول الماظ

وتجيبلها فسان زفاف
من غير كمام .. من غير كتاف
علشان يبين صدرها ..!!
واحلى زفة تزفها
واللى اسمه ايه شهر العسل
فى شرم ولا الغردقة
وبلاش امور البعزقة ...!!

ان كنت قادر مهرها قرب لها
انا مش حميّـل بختها

قال يا ام بعتة حجيب منين
انا لا انا راجل مرتشى ولا احب اجيب بالدين
ولا ارضى بالتقسيط
الطاق بيبقى طاقين
ويكتبونى شيكات او امضى على ايصالات
على انها امانات
وحكاية مش هية
لو بس فات شهرين ..ما دفعتلوش قسطين
بدل المحامى اتنين
ومصيبة وقضية
ومش حقولك ع الارف وحاجات مخلة بالشرف
اما البوليس والمحكمة
حبقى فى نظرهم منحرف وبكسر القوانين

شوفى يا ام بتعة
انا عندى شقة محندقة
معقولة ماهيش ضيقة .. فيها يا دوب اوضتين
وعملت جمعية وقبضتلى قرشين
وادى اللى عندى وقولتلك بصراحة
وباذن واحد احد ربك حيفرجها
وبتعة فى عنية وحتباتى مرتاحة

قالتله قوم من هنا .. قوم فوضها سيرة
انا احترمتك عشان الاهل والجيرة
بتقولى قال قرشين
دول يطلعو قد ايه ؟؟
وانا اللى مفكرة بتعة حتاخد بيه
حافظ على كلمتك يا اهبل وخليك ذوق
دى بعتة طول عمرها دايما تبص لفوق

احمر و اخضر وإشى محزق وبنطلونات
والشعر فوق كتفها سايح وفى الكوافير
مش كل طير يندبح
خد دش وانتة تفوق
وتتكلم كلام موزون
وفرضنا انتة اللى عاقل والمسمتع مجنون
القرشين بتوعك دول للشبكة ولا للماذون ؟؟
فيه ناس كتير زيك كدة عايشة فى الدنيا ؟؟؟؟؟
ما شوفتش الحاج متولى فى التليفزيون ؟؟؟

كل المسلسل تابعته دقيقة بدقيقة
والحاج متولى ربنا ما يوقعه فى ضيقة
راجل صحيح مقتدر ك البنات عايزاه
وبتعة بنتى الهى يكون نصيبها معاه ..!!


مش جاى تقولى الشباب
انا ناقصة هم تقيل

قال يا ام بتعة اسمعينى كل دة تمثيل
قالتله دة قصر ديل وبلاش كلام فاضى
الشعب راضى
مفيش غيرك عاملى تقيل ؟؟

قال يا ام بتعة دى ناس بتوزع الاوهام
ساعدو العدو بجهلم فى الحرب ع الاسلام
وانا مش بلوم جهلهم
اللوم على الاعلام

قالت خلاصة الكلام
انا بنتى مش من وئمكم
شوفلكو ناس على قدكم

انا بنتى حلوة مثقة
حافظة الاغانى كلها
احدث الشرايط عندها ..!!!!
ونانسى عجرم نفسها ما تجيش فى خصلة فى شعرها
ولا تيجى ضفر فى رجلها
طب والنبى .. لو شافها واحد اجنبى
ليجيب لها كل اللى يجى فى نفسها

انا بنتى عاوزة جدع عايق يكون كسيب
ابوه فى حزب اسمه ايه ويكون من المحاسيب
او زى ابن ام بطة
شغال على التهريب
او من بتوع النوادى او يكون لعيب
الجون بمليون جنيه ياعم يا حبّيب


قال يا ام بطة اللى يرضى بالحلال حيعيش
مفيش بيوت تتبنى بالغش والتهبيش
وعاداتنا حتى القيم اتقطعت اشلاء
فقد الشباب الانتماء بس المهم يعيش
تايه ما بين الفراعنة والعرب وقريش
وعلموه الاستكانة لاجل اكل العيش
وغصب عنه اتحكم بفتوة والالاضيش

قالتله قوم يا ابن زاهية يا ابن ام عين حوله
عمال تلقح كلام وتعيب فى قادة السلام
هوة انتة من دولة ؟؟؟؟؟

قوم فز غور من هنا
قوم غور ما تحبسناش
بتجيب فى سيرة اسمه ايه والفجر لسة مجاش


فاكر فى يوم اسمه ايه .. يوم احتفال اسمه ايه
ساعت ما مات اسمه ايه.. وجة بداله اسمه ايه
عمل قانون اسمه ايه .. وبيه مخلى اسمه ايه
باشا فى امن اسمه ايه .. يقطع لسان اسمه ايه
لو جاب فى سيرة اسمه ايه
يحطه فى اللى اسمه ايه
تقعد سنين منحاش
فكرك تحوش اسمه ايه ؟؟ هوة اسمه ايه ينحاش ؟؟


قال يا ام بعتة انتى ايه ؟؟
قصدك تخلى اسمه ايه .. يحبسنى فى اللى اسمها ايه
انا جبت سيرة اسمه ايه؟؟
بفرضنا قولت اسمه ايه
مهو برضو مغلطناش ..!!

قالت خلاص فوضنا .. يا تقوم تغور من هنا
انا بنتى زى القمر لسة عريسها مجاش
عاوزاه يكون مقتدر .. ويكون كبير يا بلاش
انا ناقصة هم الشباب والنفخ ع الفاضى
فاكرينى مكتب شئون
حديكو بنتى بلاش ..!!
...................
ايه رايكو بقى فى ام بتعة؟؟؟
ما داهية يكون عندها حق .!!!!